पिंपरी : शहरात ३३ पेक्षा अधिक पूल, उड्डाणपूल आणि समतल विलगक, भुयारी मार्गही असताना वाहतूककोंडी मात्र कायम आहे. वाहनांच्या वाढत्या संख्येमुळे दररोज कोंडी होत असल्याने हे प्रशस्त रस्ते आणि पूल अपुरे पडत असल्याचे चित्र आहे.
पिंपरी-चिंचवड शहर १८१ चौरस किलोमीटर क्षेत्रफळावर वसले आहे. प्रशस्त रस्त्यांसोबत पवना, मुळा आणि इंद्रायणी नद्यांवर तसेच रेल्वे मार्ग, चौक आणि महामार्गावर उड्डाणपूल उभारले आहेत. नाशिक फाटा येथील भारतरत्न जेआरडी टाटा दुमजली उड्डाणपूल, निगडीतील भक्ती-शक्ती समूह शिल्प चौकातील दुमजली उड्डाणपूल, भोसरी, चिंचवडगाव, थेरगावातील डांगे चौक येथील उड्डाणपूल हे मोठे आहेत. पुलांमुळे सुरुवातीला वाहतूक सुरळीत होती; मात्र, शहरातील वाढत्या लोकसंख्येबरोबरच वाहनांची संख्याही वाढत आहे. पूल असूनही अनेक रस्त्यांवर वाहतूककोंडीची समस्या निर्माण होत आहे. शहरातील पूल, उड्डाणपूल, पिंपरीतील इंदिरा गांधी रेल्वे उड्डाणपूल, पिंपरीगाव-पिंपळे सौदागर (दोन पूल), दापोडी हॅरिस ब्रिज (दोन पूल), दापोडी-फुगेवाडी, दापोडी-बोपोडी, दापोडी-सांगवी, बोपखेल-खडकी, सांगवी-स्पायसर महाविद्यालय, सांगवी-पुणे विद्यापीठ, नाशिक फाटा, भोसरी, असे ३३ पूल, उड्डाणपूल शहरात आहेत. तर, पिंपरीतील मिलिटरी डेअरी फार्म, चिंचवडगावातील बटरफ्लाय, पिंपळे निलख-बाणेर येथील पुलाचे काम सुरू आहे.
उपप्रादेशिक परिवहन कार्यालयाच्या माहितीनुसार शहरात एक लाख ८१ हजार वाहने, सन २०२३-२४ मध्ये शहरात एक लाख ८१ हजार दोन वाहनांची नोंद आहे. त्यामध्ये सर्वाधिक एक लाख आठ हजार १५४ दुचाकी आहेत.
एक हजार ३०० किलोमीटरचे रस्ते
शहरात १२ फुटांपासून ८० फूट रुंदीचे असे एक हजार ३०० किलोमीटर अंतराचे मुख्य व अंतर्गत रस्ते आहेत. डांबरी, काँक्रीटचे रस्ते आहेत. काँक्रिट रस्त्यांची संख्या वाढत आहे. पुण्याच्या तुलनेत पिंपरी-चिंचवडचे रस्ते खड्डेमुक्त व प्रशस्त असल्याचा महापालिका प्रशासनाचा दावा आहे.
वाहतूक नियंत्रक दिवा (सिग्नल) लागल्यानंतर काही मिनिटांसाठी पुलावर वाहने थांबतात. पावसाळ्यात वाहतूक संथ होत असल्याने पुलावर वाहने थांबलेली दिसतात. रस्ते व पदपथावरील बेशिस्त वाहनांवर पोलिसांनी कारवाई करणे अपेक्षित आहे. नागरिकांनी खासगी वाहनांचा वापर टाळून पीएमपी, मेट्रो, लोकल या सार्वजनिक वाहतूक व्यवस्थेचा, तसेच सायकलचा वापर करावा. त्यामुळे वायू व ध्वनिप्रदूषणही कमी होईल.
प्रमोद ओंभासे, मुख्य अभियंता, पिंपरी-चिंचवड महापालिका.
