पिंपरी : शहरातून वाहणाऱ्या मुळा नदी सुधार प्रकल्पाचे काम सुरू झाले आहे. पवना व इंद्रायणी नदी सुधार प्रकल्पांचे काम लवकरच सुरू करण्यात येईल. त्यासाठी अमृत योजनेतून निधी मिळणार असून महापालिका कर्जरोखे व इतर माध्यमातून निधी उभारणार असल्याचे महापालिका आयुक्त शेखर सिंह यांनी सांगितले. मुळा नदी सुधार प्रकल्पातील पहिल्या टप्प्याचे वाकड ते सांगवी पुलापर्यंतचे काम सुरू झाले आहे. त्यात नदीकडेने प्रथम जलनिस्सारण वाहिनी टाकून ते सांडपाणी शुद्धीकरण प्रकल्पाला जोडण्याचे काम सुरू करण्यात आले आहे. प्रायोगिक तत्वावर एक भागांचे सुशोभीकरण केले जाणार आहे.
शहरातील मध्य भागातून पवना नदीचे २४.४० किलोमीटर लांबीचे पात्र वाहते. त्यासाठी एक हजार ५५६ कोटीचा खर्च अपेक्षित आहे. हा निधी उभारण्याच्या विविध पर्यायावर महापालिका विचार करीत आहे. शहराच्या सीमेला लागून इंद्रायणी नदीचे १८.८० किलोमीटर लांबीचे पात्र आहे. नदीची एकच बाजू महापालिका हद्दीत येते. त्या प्रकल्पासाठी ५७७ कोटी १६ लाखांचा खर्च अपेक्षित आहे. त्या प्रकल्पाचा महापालिकेने सविस्तर प्रकल्प अहवाल (डीपीआर) तयार केला आहे. त्याला अमृत ०.२ मध्ये तत्वत: मान्यता मिळाली आहे.
त्यासाठी केंद्र व राज्य शासनाकडून उपलब्ध होणाऱ्या निधीची महापालिकेस प्रतीक्षा आहे. हा निधी लवकर उपलब्ध व्हावा यासाठी पाठपुरावा सुरू आहे. प्रकल्पासाठी निधी मंजूर झाल्यानंतर प्राधान्याने काम केले जाणार असल्याचे आयुक्त सिंह यांनी सांगितले.
आपत्तकालीन निधीतील ५८० कोटींची मागणी
पवना नदी शहराच्या मध्य भागातून वाहते. शहराला पावसाळ्यात सर्वाधिक फटका पवना नदीच्या पुराचा बसतो. त्यामुळे चिपळूण व महाडच्या धर्तीवर राज्य शासनाने पूरग्रस्त शहर म्हणून आपत्तकालीन निधीतील ५८० कोटी रूपये महापालिकेस द्यावेत, अशी मागणी सरकारकडे केली आहे. या प्रकल्पाचा खर्च मोठा असल्याने इतर पर्यायावर विचार सुरू आहे. या प्रकल्पास पर्यावरण विभागाचा ना-हरकत दाखला लवकरच मिळेल. त्यानंतर निविदा प्रक्रिया राबवून प्रत्यक्ष काम सुरू केले जाईल, असेही आयुक्त सिंंह यांनी सांगितले.
