पिंपरी : महापालिकेच्या मोशीतील कचरा डेपोला मंगळवारी आग लागली. अग्निशामक दलाच्या चार बंबांच्या साहाय्याने आणि माती टाकून आग विझवण्याचे रात्री उशिरापर्यंत प्रयत्न सुरू होते. तापमानात वाढ झाल्यामुळे आग लागल्याची शक्यता व्यक्त केली जात आहे.
मोशी येथे महापालिकेचा कचरा डेपो आहे. शहरातील घरोघरचा कचरा संकलित करून तेथे टाकला जातो. डेपोतील ह्यसॅनिटरी लॅण्डफिल’वर आग लागली. तापमान वाढल्याने कचऱ्याच्या ढिगाखाली मिथेन वायूची निर्मिती होते. त्यामुळेच आग लागल्याची शक्यता वर्तविली जात आहे.
दरम्यान, मोशीतील कचरा डेपोला ६ आणि १७ एप्रिल २०२२ रोजी आग लागली होती. ती अनेक तास धुमसत होती. त्यामुळे परिसरात धुराचे लोट पसरले होते. याप्रकरणी तत्कालीन आयुक्त राजेश पाटील यांनी मोशी कचरा डेपोची पाहणी करून चौकशी समिती नेमली होती. तसेच संबंधित ठेकेदाराला तीन लाखांचा दंडही ठोठावला होता.
तापमान वाढू लागले आहे. तापमान वाढल्याने कचऱ्याच्या ढिगाखाली मिथेन वायूची निर्मिती होते. हवेचा दाब निर्माण झाल्याने ज्वलनशील वायूचे उत्सर्जन होऊन आगीची घटना घडल्याचा प्राथमिक अंदाज आहे. पाणी आणि माती टाकून आग विझवण्यात येत आहे.
संजय कुलकर्णी, मुख्य अभियंता, पर्यावरण विभाग, पिंपरी-चिंंचवड महापालिका
