पिंपरी : पिंपरी-चिंचवड महापालिकेच्या करसंकलन विभागाने मिळकतकराची वसुली करण्यासाठी गेल्या आर्थिक वर्षात जप्तीपूर्व नोटीस देऊन मिळकती लाखबंद (सील) करणे, नळजोड खंडित करण्यासह विविध प्रकारची कारवाई करूनही शहरातील एक लाख ३०,८०३ मिळकतधारकांनी कराचा भरणा केला नसल्याची बाब समोर आली आहे. या मिळकतधारकांकडे एकूण ४३५ कोटी रुपयांची थकबाकी आहे.
पिंपरी-चिंचवड शहरात सहा लाख ५० हजार निवासी व बिगरनिवासी मिळकती असल्याची नोंद महापालिकेच्या करसंकलन व करआकारणी विभागाकडे आहे. करसंकलन विभागाला गतवर्षी एक हजार कोटीचे उद्दिष्ट दिले होते. यासाठी करसंकलन विभागाने थकीत व नियमित करवसुलीसाठी जप्तीपूर्व नोटीस देऊन जप्ती, नळजोड तोडण्याची कारवाई केली. दरमहा दोन टक्के दराने विलंब दंड आकारला जात होता. त्यानंतरही ३१ मार्चअखेर ९६६ कोटी रुपयांपर्यंत करवसुली केली. एक लाख ३० हजार ८०३ मिळकतधारकांनी थकीत व मूळ कर भरला नसल्याचे निदर्शनास आले आहे. या थकबाकीदारांकडे महापालिकेचे विशेष लक्ष असणार असून, त्यांचा कर वसूल करण्यास प्राधान्य देण्यात येणार असल्याचे सहायक आयुक्त अविनाश शिंदे यांनी सांगितले.
मालमत्ता संख्या थकीत रक्कम
बिगरनिवासी ११ हजार ५९५ ७२ कोटी सात लाख
औद्योगिक ७०१ १७ कोटी सात लाख
मिश्र तीन हजार ९३६ २८ कोटी ४४ लाख
निवासी एक लाख ९, ६०० २६६ कोटी ८० लाख
मोकळी जमीन चार हजार ६८७ ५० कोटी ५५ लाख
इतर २८४ ५८ लाख
एकूण एक लाख ३०, ८०३ ४३४ कोटी ५१ लाख
गेल्या आर्थिक वर्षात एक हजार ७२ मिळकती लाखबंद करण्यात आल्या. त्यापैकी ५१० मिळकतधारकांनी कर भरला आहे. ५६२ मिळकतधारकांनी अद्याप कराचा भरणा केला नाही. त्यामुळे या मिळकतींचा लिलाव करण्यात येणार आहे. थकीत करवसुलीसाठी जप्तीची कारवाई सुरूच ठेवण्यात येणार आहे.
– प्रदीप जांभळे-पाटील, अतिरिक्त आयुक्त, पिंपरी-चिंचवड महापालिका
