मुंबई : आज उच्च न्यायालयाने दसरा मेळाव्यासाठी शिवसेनेच्या ठाकरे गटाला शिवाजी पार्कवर सभा घेण्याची परवानगी देण्याचा मोठा निकाल दिला. यानंतर राज्याचे विरोधी पक्षनेते अजित पवार यांनी या निर्णयावर पहिली प्रतिक्रिया दिली. “शिवसेना प्रमुख बाळासाहेब ठाकरेंनी सांगितलं होतं की माझ्यानंतर उद्धव ठाकरे शिवसेना प्रमुख म्हणून काम बघतील. तुम्ही सर्वांनी त्यांच्या पाठिशी उभं राहा, अशी प्रतिक्रिया अजित पवारांनी दिली. ते शुक्रवारी (२३ सप्टेंबर) माध्यमांशी बोलत होते.
अजित पवार म्हणाले, “बीएमसीमधील जागा एकनाथ शिंदे गटाला देण्यात आली होती. तेव्हाच मी म्हटलं होतं की आता शिवाजी पार्कची जागा ठाकरे गटाला द्यावी. शिवसेना प्रमुख बाळासाहेब ठाकरेंनी दसरा मेळाव्याची परंपरा सुरू केली आहे. ही परंपरा शिवसैनिकांना हवी आहे. शिवसैनिकांना उद्धव ठाकरेंचे विचार ऐकायचे आहेत.
देशात कुठेच न्याय मिळाला नाही, तर शेवटी आपण न्यायालयात जातो. न्याय व्यवस्था न्याय देते. अशाप्रकारे शिवसेनेला न्याय मिळाला आहे. त्याबद्दल मी मनापासून समाधान व्यक्त करतो. निरपेक्ष पद्धतीने हा न्याय मिळाला आहे. या निकालाने शिवसैनिकांच्या मनातही उत्साह संचारला असेल,” असंही पवारांनी नमूद केलं.
