पुणे – मुंढवा भागातील एका हॉटेलमध्ये शहर पोलीस दलातील तीन पोलिसांनी गोंधळ घातला. या प्रकरणी तीन पोलीस शिपायांच्या विरोधात गुन्हा दाखल करण्यात आला असून, त्यांना पोलीस दलातून निलंबित करण्याचे आदेश देण्यात आले.
याप्रकरणी पोलीस शिपाई उमेश मरीस्वामी मठपती (वय 29, रा. सोमवार पेठ), अमित सुरेश जाधव (वय 37, रा. भवानी पेठ) ,योगेश भगवान गायकवाड (वय 32, रा. केशवनगर) यांच्या विरोधात गुन्हा दाखल करण्यात आला आहे.
याबाबत पब व्यवस्थापक कुणाल दशरथ मद्रे (वय 27, रा. घोरपडी) यांनी मुंढवा पोलीस ठाण्यात फिर्याद दिली होती. तिघांच्या विरोधात मारहाण तसेच मुंबई दारुबंदी कायद्यान्वये गुन्हा दाखल करण्यात आला आहे. मठपती फरासखाना पोलीस ठाणे, गायकवाड चंदननगर पोलीस ठाण्यात तसेच जाधव समर्थ वाहतूक विभागात नियुक्तीस होते. मुंढवा परिसरातील मेट्रो लाऊंज हॉटेलमध्ये मद्रे व्यवस्थापक आहे.
सोमवारी (दि. 21) मध्यरात्री एक वाजण्याच्या सुमारास मद्रे हॉटले बंद करत होते. त्यावेळी हे तिघे तेथे आले. तिघांनी दारु प्यायली. त्यानंतर तिघांनी पुन्हा दारु मागितली. हॉटेल बंद झाल्याचे सांगून आता दारु मिळणार नाही, असे हॉटेलमधील कर्मचारी रोहित काटकर याने सांगितले. तेव्हा तिघांनी काटकरला मारहाण केली. मद्रे यांनी तिघांना तेथून जाण्यास सांगितले. तेव्हा तिघांनी मद्रे यांना धमकावले. तुम्ही काही करु शकणार नाहीत. आम्ही पोलीस आहोत, असे सांगून शिवीगाळ केली. त्यांना धमकी दिली. या प्रकरणी तिघांच्या विरोधात गुन्हा दाखल करण्यात आला होता.
