पुणे – कसबा पेठ विधानसभा पोटनिवडणुकीत पैसे वाटप केल्याच्या आरोपावरुन भाजपचे माजी नगरसेवक गणेश बिडकर यांच्यासह कार्यकर्त्यांविरुद्ध समर्थ पोलिस ठाण्यात अदखलपात्र गुन्हा दाखल केला आहे.
याबाबत युवक काँग्रेसचे कॅन्टोन्मेंट विभागाचे माजी अध्यक्ष फैयाज कासम शेख (वय ३८, रा. मंगळवार पेठ) यांनी समर्थ पोलिस ठाण्यात फिर्याद दिली आहे. त्यावरून बिडकर यांच्यासह मयूर चव्हाण, नईम शेख, बाला शेख यांच्याविरुद्ध अदखलपात्र गुन्हा दाखल करण्यात आला आहे.
बिडकर आणि त्यांचे कार्यकर्ते रविवारी (ता.२६) दुपारी दोनच्या सुमारास मंगळवार पेठेतील आएशा कॉम्प्लेक्समध्ये कार्यकर्त्यांसह आले होते.त्यावेळी भाजपचे कार्यकर्ते पैसे वाटप करत असल्याची माहिती शेख यांना मिळाली. त्यांनी याबाबत बिडकर आणि त्यांच्या कार्यकर्त्यांकडे विचारणा केली. त्यावेळी त्यांनी फैयाज आणि याकूब शेख यांना शिवीगाळ करुन धक्काबुक्की केली, असे शेख यांनी तक्रारीत म्हटले आहे.
काँग्रेस कार्यकर्त्यांकडून यावेळी महिलेला मारहाण करण्यात आली. परंतु पोलिसांनी दबावापोटी महिलेची तक्रार घेतली नाही. काँग्रेसकडून ज्या पद्धतीचे राजकारण केले जात आहे, त्याचा मी निषेध करतो. या प्रकरणात पोलिसांना पूर्ण सहकार्य करू.- गणेश बिडकर, माजी नगरसेवक, भाजप
