मुंबई : आगामी २०२४ लोकसभा-विधानसभा निवडणुकीत शिंदे गट आणि भाजपला जोरदार टक्कर देण्यासाठी ठाकरे गटाने जोरदार तयारी सुरु केली आहे. शिवसेना उद्धव बाळासाहेब ठाकरे गटाकडून आज जिल्हाप्रमुख आणि जिल्हा संपर्कप्रमुखांची बैठक बोलवण्यात आली होती. यामध्ये शिवसेनेला डोकेदुखी ठरलेल्या अमरावती लोकसभा मतदारसंघातून नवनीत राणा यांच्याविरोधात खडा संघर्ष उभारण्यासाठी जोरदार हालचाली करण्यात आल्या.
या बैठकीत प्रामुख्याने लोकसभा आणि विधानसभा निवडणुकीच्या रणनीतीवर चर्चा करण्यात आली. छत्रपती संभाजीनगर लोकसभा मतदारसंघ आणि अमरावती मतदारसंघातून लोकसभेवर आपला उमेदवार निवडून आणण्याचे निश्चित करण्यात आले आहे. यासंदर्भात छत्रपती संभाजीनगर आणि अमरावती जिल्हाप्रमुख आणि जिल्हा संपर्कप्रमुखांवर मोठी जबाबदारी देण्यात आली आहे.
छत्रपती संभाजीनगर लोकसभा मतदारसंघात ठाकरे गटातून माजी खासदार चंद्रकांत खैरे किंवा विधान परिषदेवरील विरोधी पक्षनेते अंबादास दानवे विरुद्ध एमआयएमचे खासदार इम्तियाज जलील यांच्यात लढत होण्याची शक्यता आहे. तर सुषमा अंधारेंना अमरावतीतून रिंगणात उतरवण्याचा ठाकरे गटाचा प्रयत्न असणार आहे. शिवसेनेने 2019 मध्ये जिंकलेल्या 18 लोकसभा मतदारसंघांसोबतच, छत्रपती संभाजीनगर आणि अमरावती लोकसभा मतदारसंघातही शिवसेना ठाकरे गट आक्रमकपणे निवडणूक लढणार आहे.
