पुणे : गणेशोत्सवासाठी कोकणात – जाणाऱ्या गणेशभक्तांना शनिवार, दि. १६ सप्टेंबर ते दि. १ ऑक्टोबर या कालावधीत टोल माफी देण्याचा निर्णय मुख्यमंत्री एकनाथ शिंदे यांनी घेतला आहे. त्यासंबंधीचा शासन निर्णय प्रसिद्ध करण्यात आला आहे. मुंबई- बंगळुरु राष्ट्रीय महामार्ग, मुंबई – गोवा राष्ट्रीय महामार्ग यावरील आणि इतर सार्वजनिक बांधकाम विभागांच्या रस्त्यांवरील टोल नाक्यांवर ही सवलत लागू असणार आहे.
गणेशोत्सवासाठी कोकणात गणेशभक्तांना टोलमाफीसह अन्य सोई सुविधा उपलब्ध करुन देण्याचे आदेश मुख्यमंत्र्यांनी सार्वजनिक बांधकाम विभागाला दिले होते, त्यानुसार शुक्रवारी सार्वजनिक बांधकाम विभागाने पथकर सवलतीचा शासन निर्णय जारी केला आहे. या टोलमाफी सवलतीसाठी गणेशोत्सव, कोकण दर्शन अशा आशयाचे स्टीकर्स स्वरुपाचे टोल माफी पास, त्यावर वाहन क्रमांक, चालकाचे नाव असा मजकूर लिहून जाणाऱ्या ते स्टीकर्स आवश्यक त्या संख्येनुसार परिवहन विभाग, पोलीस, वाहतूक पोलीस, संबंधित प्रादेशिक परिवहन विभाग (आर.टी.ओ.) यांनी समन्वय साधून पोलीस ठाणे, वाहतूक पोलीस चौक्या व आर. टी. ओ. कार्यालयांमध्ये उपलब्ध करुन द्यावेत, असे आदेश देण्यात आले आहेत. हाच पास परतीच्या प्रवासाकरीता देखील ग्राह्य धरण्यात येईल, असे शासनाने म्हटले आहे.
