पुणे : पुणे-मुंबई द्रुतगती महामार्गावरून दररोज सुमारे दीड लाख वाहने धावतात. हा एक्स्प्रेस वे आठपदरी करण्यात येणार आहे. त्यासाठी शंभर हेक्टर जागेची आवश्यकता आहे. या संदर्भातील प्रस्ताव महाराष्ट्र राज्य रस्ते विकास महामंडळाने (एमएसआरडीसी) तयार केला असून लवकरच तो राज्य सरकारकडे मान्यतेसाठी पाठविण्यात येणार आहे.
पुणे-मुंबई द्रुतगती महामार्ग हा सध्या सहापदरी आहे. वाहनांची दिवसेंदिवस वाढती वर्दळ लक्षात घेऊन सध्या हा मार्ग अपुरा पडत आहे. त्यामुळे रुंदीकरण करण्याचा प्रस्ताव ‘एमएसआरडीसी’ने तयार केला आहे. महामार्ग हा सुमारे ९४ किलोमीटर लांबीचा आहे.
या महामार्गावरील खोपोली एक्झिट ते कुसगाव या भागातील १३.३ किलोमीटरच्या मिसिंग लिंक प्रकल्पाचे काम सुरू आहे. त्याअंतर्गत दोन बोगदे असून या दोन्ही बोगद्याचे काम पूर्ण झाले आहे. तर आशिया खंडातील सर्वांत उंच दरी पुलाचे काम वेगाने सुरू आहे. या प्रकल्पामुळे मुंबई-पुणे अंतर कमी होण्यास मदत होणार आहे.
या प्रकल्पांतर्गत खालापूर टोलनाका ते खोपोली एक्झिटपर्यंत आठपदरी रस्ता तयार करण्यात येत आहे. त्यामुळे पुढील उर्से टोलनाक्यापासून द्रुतगती महामार्ग आठपदरी करण्याचा निर्णय ‘एमएसआरडीसी’ने घेतला आहे. हे अंतर जवळपास ७० किलोमीटर आहे. त्यामुळे द्रुतगती महामार्ग सलग आठपदरी होऊन विना अडथळा प्रवास वेगाने होणार आहे.
