पुणे : काँग्रेसच्या केंद्रीय निवडणूक समितीची आज दिल्लीत महत्त्वाची बैठक पार पडली. या बैठकीत महाराष्ट्रातील लोकसभेच्या जागांबाबत महत्त्वाचा निर्णय घेण्यात आला. यामध्ये पुणे लोकसभेसाठी कसब्याचे आमदार रवींद्र धंगेकर यांची उमेदवारी निश्चित होणार असल्याने पुण्यात भाजपचे मुरलीधर मोहोळ यांच्याविरुद्ध रवींद्र धंगेकर यांच्यात लढत होणार असल्याचे जवळपास निश्चित झाले आहे.
काँग्रेस महाराष्ट्रात तब्बल 18 जागांवर निवडणूक लढवण्याच्या तयारीत आहे. विशेष म्हणजे आजच्या बैठकीत या 18 उमेदवारांच्या नावावर चर्चा झाली. यापैकी काही उमेदवार निश्चित झाले आहेत. काँग्रेसच्या या लोकसभा उमेदवारांची यादीतून अतिशय महत्त्वाची माहिती समोर येत आहे. विशेष म्हणजे पुण्यात महाविकास आघाडीकडून कोण उमेदवार राहील? याबाबत वेगवेगळे तर्कवितर्क लढवले जात होते. मनसेला सोडचिठ्ठी देणारे नेते वसंत मोरे यांना महाविकास आघाडीकडून उमेदवारी दिली जाईल, अशी चर्चा होती. पण आता काँग्रेसच्या यादीत पुण्याच्या उमेदवाराचे नाव निश्चित करण्यात आलं आहे. यात काँग्रेस आमदार रवींद्र धंगेकर यांचं नाव पुणे लोकसभा मतदारसंघासाठी निश्चित झाल्याची माहिती सूत्रांनी दिली आहे.
सूत्रांनी दिलेल्या माहितीनुसार, सोलापुरातून प्रणिती शिंदे, पुण्यातून रविंद्र धंगेकर यांना उमेदवारी दिली आहे. तर अमरावतीतून बळवंत वानखेडे, नंदुरबारमधून के. सी. पाडवी यांचे चिरंजीव, गडचिरोलीतून नामदेव उसेंडी यांना उमेदवारी दिल्याचं निश्चित झालं आहे. कोल्हापुरात शाहू छत्रपती महाराजांना उमेदवारी दिल्याची माहिती समोर येत आहे. काँग्रेसच्या उमेदवारांची अधिकृत यादी उद्या किंवा परवा जाहीर करण्यात येणार आहे. या यादीकडे संपूर्ण महाराष्ट्राचं लक्ष लागलेलं आहे. पण त्याआधी काही निश्चित झाली आहेत.
काँग्रेसकडून ‘या’ उमेदवारांची नावे निश्चित
चंद्रपूर – विरोधी पक्ष नेते विजय वडेट्टीवार
अमरावती – आ.बळवंत वानखेडे
नागपूर – आ.विकास ठाकरे
सोलापूर – आ. प्रणिती शिंदे
कोल्हापूर – शाहू छत्रपती
पुणे – आ.रवींद्र धंगेकर
नंदुरबार – गोवाशा पाडवी (के. सी पाडवी यांचा मुलगा)
नागपूर – आ.विकास ठाकरे
गोंदिया- भंडारा – प्रदेशाध्यक्ष आ. नाना पटोले
गडचिरोली – नामदेव किरसान
अकोला – अभय पाटील
नांदेड – वसंतराव चव्हाण
लातूर – डॉ. कलगे
दोन किंवा तीन जागांसाठी चर्चा सुरु, वडेट्टीवार यांची माहिती
महाविकास आघाडीची मुंबईत उद्या सकाळी दहा वाजता एक महत्त्वपूर्ण बैठक होणार आहे. या बैठकीत जागावाटपाचा तिढा सोडवण्यात येणार आहे. काँग्रेसचे नेते विजय वडेट्टीवार यांनी दिल्लीतील बैठकीनंतर पत्रकारांना प्रतिक्रिया दिली. “आता फार काही वाद राहिलेला नाही. दोन किंवा तीन जागांच्या संदर्भात चर्चा सुरु आहे. त्याबाबत अंतिम निर्णय बाकी आहे. याबाबत उद्या सकाळी महाविकास आघाडीच्या प्रमुख नेत्यांची बैठक होणार आहे. या बैठकीत निर्णय घेतला जाणार आहे”, अशी प्रतिक्रिया विजय वडेट्टीवार यांनी दिली.
