पुणे, २१ मार्च : राष्ट्रवादी काँग्रेसच्या दोन गटांमधील वाद आता पवार कुटुंबियांमध्ये येवून पोहोचतो की काय? अशी परिस्थिती आहे. उपमुख्यमंत्री अजित पवार यांचे मोठे बंधू श्रीनिवास पवार यांनी राष्ट्रवादी काँग्रेसचे अध्यक्ष शरद पवार यांना पाठिंबा दर्शवला. त्यांनी अजित पवार यांच्यावर सडकून टीका केली. त्यानंतर बारामतीत आज वेगळाच प्रकार बघायला मिळाला आहे.
अजित पवार गटाच्या कार्यकर्त्यांनी श्रीनिवास पवार यांचे चिरंजीव युगेंद्र पवार यांना घेराव घातला. संबंधित प्रकार हा कॅमेऱ्यातही कैद झाला. अजित पवार गटाच्या कार्यकर्त्यांनी युगेंद्र पवार यांना अजित पवारांची बदनामी का करत आहात? असा जाब विचारला. यावेळी युगेंद्र पवार यांच्यासोबत असलेल्या इतर काही व्यक्तींनी त्या कार्यकर्त्यांची समजूत काढली. त्यानंतर युगेंद्र पवार तिथून निघून गेले. संपूर्ण पवार कुटुंब यांनी अजित पवार यांना एकाकी पाडल्यानंतर संपूर्ण बारामतीकर त्यांचे कुटुंब बनून पुढे येताना दिसत आहेत. तालुक्यासाठी विकासाची गंगा आणणाऱ्या अजित दादांना पवार कुटुंबाने एकाकी पडल्याने त्यांची ढाल म्हणून बारामतीकर पुढे येताना दिसत आहेत. या प्रकाराची सध्या बारामतीत जोरदार चर्चा सुरु आहे.
