महायुतीच्या ११ जागांवर अद्याप चर्चेचं गुऱ्हाळ सुरु आहे. तिकडे महाविकास आघाडीतल्या शिवसेनेने २१ जागा जाहीर केल्या आहेत. तर संजय निरुपम यांना पक्षविरोधी वक्तव्यं केल्याने पक्षातून हाकलण्यात आलं आहे. काँग्रेसने या कारवाईचे संकेत दिलेच होते. ती कारवाई त्यांच्यावर करण्यात आली आहे. आता संजय निरुपम हे एकनाथ शिंदेंच्या शिवसेनेत जाण्याची शक्यता आहे.
महायुतीचं जागावाटप ९० टक्के पूर्ण झालं असलं तरी अद्याप काही जागांवरून जागा वाटप अडलंय. दुसऱ्या टप्प्यातील निवडणुकांसाठी अधिसूचनाही निघाली. पण अद्याप महायुतीत जागा वाटपावरून तिढा काही सुटलेला नाही. नाशिकमध्ये भाजप आणि शिंदे गट आणि अजित पवार यांच्या राष्ट्रवादीचा दावा आहे. तर बुलढाण्यात शिदेंच्या शिवसेनेतच बंडखोरी, आमदार संजय गायकवाडांकडून उमेदवारी अर्ज दाखल केलाय. हातकणंगले येथून शिंदेच्या शिवसेनेकडून धैर्यशील माने यांचा दावा आहे तर सदाभाऊ खोतही तेथे आग्रही आहे. हिंगोलीची जागा शिंदेंच्या शिवसेनेकडे आहे, मात्र भाजपसोबत रस्सीखेच सुरू आहे. धाराशीवची जागा अजित पवार यांच्या राष्ट्रवादीकडे आहे. मात्र भाजप माजी IAS अधिकारी प्रवीण परदेशींना तिकीट देण्यास इच्छुक असल्याचे सांगितले जात आहे.
