नागपूर : १० जानेवारी २००६ रोजीच्या शासन निर्णयानुसार शिक्षेत सूट देण्याची मुंबईतील कुख्यात डॉन अरुण गवळी याची विनंती मुंबई उच्च न्यायालयाच्या नागपूर खंडपीठाने शुक्रवारी मंजूर केली. न्यायमूर्तिद्वय विनय जोशी व वृषाली जोशी यांनी हा निर्णय दिला.
गवळीला शिवसेनेचे नगरसेवक कमलाकर जामसांदेकर यांच्या खून प्रकरणात जन्मठेपेची शिक्षा झाली होती. तो नागपूर मध्यवर्ती कारागृहात शिक्षा भोगत होता. १० जानेवारी २००६ रोजीच्या शासन निर्णयामध्ये १४ वर्षे तुरुंगवास भोगलेल्या आणि वयाची ६५ वर्षे पूर्ण झालेल्या कैद्यांना शिक्षेत सूट देण्याची तरतूद आहे. गवळीने वयाची ७० वर्षे पूर्ण केली असून तो मे-२००८ पासून तुरुंगात होता.
या शासन निर्णयानुसार शिक्षेत सूट मिळविण्यासाठी गवळीने सुरुवातीला कारागृह अधीक्षकांना अर्ज सादर केला होता. गवळीला या शासन निर्णयाचा लाभ दिला जाऊ शकत नाही, असे कारण नमूद करून तो अर्ज १२ जानेवारी २०२३ रोजी फेटाळण्यात आला. त्यामुळे गवळीने उच्च न्यायालयात धाव घेतली होती. गवळीतर्फे वकील मीर नगमान अली यांनी बाजू मांडली.
