पुणे : शाळकरी मुलीला वेश्याव्यवसायास प्रवृत्त केल्याप्रकरणी दोन महिलांसह चौघांना न्यायाधीश के. डी. शिरभाते यांनी दहा वर्ष सक्तमजुरीची शिक्षा सुनावली. आरोपी महिलांना शिक्षेसह प्रत्येकी २९ हजार ५०० रुपये, तसेच साथीदारांना प्रत्येकी दहा हजार रुपयांचा दंड ठोठाविण्यात आला.
काेमल सुनील मोरे उर्फ कोरे (वय २६, रा. कोथरूड, मूळ रा. भोर), रेश्मा महेश गायकवाड उर्फ रेश्मा सुरोसे (यय २९, रा. उत्तमनगर), सुनील ब्रिजलाल कोरी (वय २९, रा. येवलेवाडी, कोंढवा, मूळ रा. उत्तर प्रदेश), जसाराम भयाराम सुतार (वय ५७, रा. वडगाव बुद्रुक, सिंहगड रस्ता) अशी शिक्षा सुनावलेल्यांची नावे आहेत. आरोपी महिला आणि साथीदारांनी एका पंधरा वर्षीय शाळकरी मुलीला पुण्यात चांगले शिक्षण देण्याचे आमिष दाखवून तिला गावाहून आणले होते. मुलीला शाळेत पाठविण्याऐवजी आरोपींनी तिला वेश्याव्यवसायास प्रवृत्त केले होते. याबाबत पोलिसांकडे तक्रार दाखल झाल्यानंतर चौघांना अटक करण्यात आली होती.
