नाशिक : कुणाल कामरा या तरुण कलाकाराचे व्यासपीठ तोडणे ही औरंगजेबी वृत्ती आहे. कामराने टीका केल्यावर ‘हॅबिटट स्टुडिओ’ अनधिकृत असल्याचा साक्षात्कार झाला. मुंबई महापालिकेला अनधिकृत बांधकामे तोडायची असतील तर, त्यांनी बुलडोझर मलबार हिलला फिरवावा, असे आव्हान शिवसेनेचे (उध्दव ठाकरे) खासदार संजय राऊत यांनी दिले. ‘वर्षा’ बंगल्यापासून निरीक्षण करावे, सर्वच मंत्र्यांच्या बंगल्यात अनधिकृत बांधकामे झाल्याचा आरोपही त्यांनी केला.
नाशिक दौऱ्यावर आलेल्या खासदार राऊत यांनी विविध विषयांवर प्रसारमाध्यमांशी संवाद साधला. कुणाल कामराने काहीही चुकीचे केले नसल्याचा पुनरुच्चार त्यांनी केला. त्याने काँग्रेससह माजी पंतप्रधान मनमोहन सिंग, सोनिया गांधी यांच्यावरही असे कार्यक्रम केले आहेत. या वेळी कामराने काही चुकीचे केले असेल तर त्याच्यावर कायदेशीर कारवाई करता आली असती. त्याला कुणाची हरकत नव्हती. परंतु, गुंडगिरी करून तरुण कलाकारांचे व्यासपीठ तोडण्यात आले. औरंगजेबाने हिंदुंची मंदिरे तोडली होती, तुम्ही लोकशाहीचे मंदिर तोडले, असे टीकास्त्र राऊत यांनी सत्ताधाऱ्यांवर सोडले.
नागपूर दंगलीची ठिणगी टाकणारे मंत्रिमंडळात आहेत. तेच कायदा सुव्यवस्थेला आव्हान देत आहेत. कायदा व सुव्यवस्थेला आव्हान म्हणजे गृहमंत्र्यांना आव्हान, हे मुख्यमंत्री देवेंद्र फडणवीस यांनी समजून घेतले पाहिजे, असे राऊत यांनी सांगितले.
