मुंबई : ‘येरे येरे पैसा ३’ चित्रपटाचा ट्रेलर लॉंच झालेला आहे. तर माझा ट्रेलर मी कालच लॉंच केला, पण पिक्चर अभी बाकी है, अशी कोपरखळी मारत महाराष्ट्र नवनिर्माण सेनेचे अध्यक्ष राज ठाकरे यांनी हिंदी भाषा सक्तीसंदर्भात आपण अजूनही लक्ष ठेवून आहोत याची जाणीव करून दिली. तसेच एका चित्रपटाचे तीन भाग येणे, ही मराठी चित्रपटसृष्टीसाठी महत्वपूर्ण गोष्ट व मैलाचा दगड असल्याचेही राज ठाकरे यांनी सांगितले.
‘येरे येरे पैसा’ आणि ‘येरे येरे पैसा २’च्या यशानंतर ‘येरे येरे पैसा ३’ हा चित्रपट १८ जुलैपासून चित्रपटगृहात प्रदर्शित होत आहे. संजय जाधव दिग्दर्शित ‘येरे येरे पैसा ३’ या चित्रपटाचा ट्रेलर लॉंच सोहळा सोमवार, ३० जून रोजी महाराष्ट्र नवनिर्माण सेनेचे अध्यक्ष राज ठाकरे आणि प्रसिद्ध दिग्दर्शक रोहित शेट्टी यांच्या प्रमुख उपस्थितीत मुंबईत पार पडला. याप्रसंगी चित्रपटातील सर्व कलाकार आणि तंत्रज्ञांनी हजेरी लावली होती.दरम्यान, अमेय खोपकर, दिग्दर्शक संजय जाधव आणि सहकाऱ्यांनी ‘येरे येरे पैसा’ चित्रपटाचा तिसरा भाग काढण्याची हिंमत दाखवलेली आहे आणि त्यांना उत्तम कलाकारांची साथ मिळालेली आहे. या चित्रपटाचा पहिला भाग प्रचंड लोकप्रिय ठरला होता आणि आता तिसरा भागही तितकाच लोकप्रिय होईल, अशी मी आशा बाळगतो आणि संपूर्ण चमूला मनापासून शुभेच्छा देतो, असेही राज ठाकरे म्हणाले.
