पुणे : मराठा आरक्षणाबाबत दोन समुदायांमध्ये तेढ निर्माण करणारे वक्तव्य केल्याप्रकरणी पुणे पोलिसांनी दाखल केलेल्या गुन्ह्यात उच्च न्यायलयाने वकील गुणरत्न सदावर्ते यांनी मंगळवारी अटकपूर्व जामीन मंजूर केला. या प्रकरणासह अन्य प्रकरणातही यापूर्वीच जामीन मिळाला असल्याने मंगळवारी संध्याकाळी सदावर्ते यांची आर्थर रोड कारागृहातून सुटका करण्यात आली.
न्यायालयाने सदावर्ते यांना २५ हजार रुपयांच्या हमीवर अटकपूर्व जामीन मंजूर करत ४,५ आणि ६ मे रोजी पुणे पोलिसांसमोर हजर राहण्याचे आदेश दिले. दरम्यान १८ दिवसांनी तुरुंगातून सुटका झाल्यानंतर गुणरत्न सदावर्ते यांनी अजब दावे केले आहेत.
गुणरत्न सदावर्ते यांनी आपण जेलमध्ये असताना फक्त पाण्यावर होतो असा दावा केला आहे. “सरकारला काय करायचं ते करु दे पण तत्वं सोडायची नाहीत. लॉकअपमध्ये गेल्यापासून मी फक्त पाण्यावर आहे. येणाऱ्या काळात कष्टकऱ्यांसाठी लढणार आहेत. माझी मुस्कटदाबी केली तरीही मी मागे फिरलो नाही,” असं ते प्रसारमाध्यमांशी बोलताना म्हणाले. यापूर्वीही खासदार नवनीत राणा यांनी पोलिसांनी पिण्यास पाणी व शौचालय वापरण्यास बंदी केले असल्याचे म्हटले होते.
