मुंबई : निवडणूक आयोगाने शिवसेना नाव व धनुष्यबाण चिन्ह गोठवल्यानंतर उद्धव ठाकरे यांच्या शिवसेनेकडून निवडणूक आयोगाकडे तीन चिन्ह आणि तीन नावांचा प्रस्ताव देण्यात आला आहे. याबाबतची अधिकृत शिवसेना पक्षप्रमुख उद्धव ठाकरे यांनी फेसबुक लाईव्ह करून दिली आहे.
उद्धव ठाकरेंनी आज सायंकाळी फेसबुक लाईव्हच्या माध्यमातून राज्यातील शिवसैनिकांशी संवाद साधला. यावेळी बोलताना त्यांनी म्हटलं, निवडणूक आयोगाकडे आमचे धनुष्यबाणचिन्ह तात्पुरते गोठवल्याने आम्ही “त्रिशुळ, मशाल आणि उगवत्या सूर्याच्या चिन्हाचा पर्याय पाठवला आहे. त्याचसोबत शिवसेना शब्दाचा वापर करण्यावर बंदी घातल्यानंतर ‘शिवसेना बाळासाहेब ठाकरे’, ‘शिवसेना प्रबोधनकार ठाकरे’ आणि ‘शिवसेना उद्धव बाळासाहेब ठाकरे’ अशी तीन नावेही निवडणूक आयोगाला सुचवण्यात आली आहेत,” असे उद्धव ठाकरेंनी सांगितलं.
यावेळी बोलताना त्यांनी निवडणूक आयोगाकडून कोणतेही निर्णय घेताना निपक्षपातीपणाने राहिलं पाहिजे अशी भावना व्यक्त केली. शनिवारी शिवसेनेकडून नावे आणि चिन्हे सादर केली आहेत. अंधेरीची पोटनिवडणूक लागली असून, चार दिवसांत अर्ज भरण्याचा शेवटचा दिवस आहे. त्यामुळे आम्हाला लवकरात लवकर एक चिन्ह आणि एक नाव द्या. निवडणूक आयोगाने शिवसेनेने दिलेली तीन चिन्ह आणि तीन नावे जनतेला सांगितली आहेत. मात्र, शिंदे गटाने काय सादर केलं, याची माहिती दिली नाही,” असेही उद्धव ठाकरेंनी म्हटलं.
