इंदोर येथे सुरु असलेल्या खेलो इंडिया यूथ गेम्स स्पर्धेत बुधवारी महाराष्ट्र संघाने टेबल टेनिसमधून सुवर्णपदकासह आपले खाते उघडले आणि याच क्रीडा प्रकारातून आणखी एक रौप्य व कांस्यपदक मिळवित पदकांची हॅट्ट्रिक साजरी केली.
टेबल टेनिसमध्ये पृथा वर्टीकर व जेनिफर वर्गीस या जोडीने महिलांच्या दुहेरीत विजेतेपद पटकावित महाराष्ट्राचे पदकांचे खाते उघडले. याच क्रीडा प्रकारात महाराष्ट्राच्याच तनिषा कोटेचा व रिशा मिरचंदानीने रौप्यपदक मिळविले. पुरुषांच्या दुहेरीत महाराष्ट्राच्या जश मोदी व नील मुळ्ये या जोडीने कांस्यपदक प्राप्त केले.
टेबल टेनिसमध्ये महिलांच्या दुहेरीत महाराष्ट्राच्या जोड्यांनी अंतिम फेरीत धडक मारल्यामुळे महाराष्ट्राला दोन्ही पदके मिळणार हे निश्चित झाले होते. केवळ जिंकणार कोण, याची उत्कंठा होती. अखेर पृथा व जेनिफरने तनिषा-रिशा या जोडीचा 13-11, 11-1, 11-7 असा पराभव केला. तीनही गेम्समध्ये महाराष्ट्राच्या खेळाडूंनी परतीचे फटके लगावत सुरेख खेळ केला. विजेतेपदाची खात्री होती, परंतु आमच्याच सहकार्यांविरुद्ध अंतिम सामना होईल, अशी आम्ही अपेक्षा केली नव्हती. अर्थात अंतिम सामन्यात आमच्याच सहकारी प्रतिस्पर्धी होत्या त्यामुळे आम्हालासुद्धा खेळाचा आनंद घेता आला, असे पृथा व जेनिफर यांनी सांगितले.
पुरुष गटात कांस्यपदकासाठी झालेल्या लढतीत मोदी व मुळ्येने पश्चिम बंगालच्या अंकुर भट्टाचार्य व सौम्यदीप सरकारचा 11-6, 11-5, 11-8 असा पराभव केला. महाराष्ट्राच्या जोडीने सुरुवातीपासूनच सामन्यावर नियंत्रण मिळविले. महाराष्ट्रासाठी पदक मिळविल्यामुळे आम्हाला खूप समाधान वाटत आहे. आम्ही सराव शिबिरात भरपूर सराव केल्यामुळे आम्हाला एकमेकांच्या खेळाचा अभ्यास होता आणि त्याप्रमाणे आम्ही या सामन्यात समन्वय ठेवण्यात यशस्वी झालो, असे कांस्यपदक विजेत्या मोदी व मुळ्ये म्हणाल्या. महाराष्ट्र संघातील सर्वच खेळाडू अतिशय नैपुण्यवान आहेत याचा प्रत्यय त्यांनी घडवून दिला आहे, अशा शब्दात महाराष्ट्र संघाचे प्रशिक्षक सुनील बाब’स यांनी खेळाडूंची प्रशंसा केली.
