पुणे – ज्या नागरिकांच्या आधारकार्डला दहा वर्षे पूर्ण झाली आहेत किंवा त्यापेक्षा अधिक कालावधीपासून पत्ता किंवा अन्य अनुषंगिक तपशील अद्ययावत केलेला नाही, अशा सर्व नागरिकांनी आधार कार्डला ओळखीचा पुरावा व पत्त्याचा पुरावा अद्ययावत करणे आवश्यक आहे. त्यानुसार जिल्हा प्रशासनाकडून आधार अद्ययावत करण्याची मोहीम सुरू करण्यात आली आहे.
केंद्र आणि राज्य शासनाच्या विविध योजना, लाभ यांसह रुग्णालये, शाळा, महाविद्यालये, मोबाइल सीमकार्ड घेणे किंवा अद्ययावत करणे, बँक खाते उघडण्यापासून ते अगदी स्मशानभूमीपर्यंत सर्व ठिकाणी ओळखीचा पुरावा म्हणून आधारची मागणी केली जाते. या योजना आणि सेवांचा लाभ घेण्यासाठी सर्व नागरिकांना आधार डाटा वैयक्तिक तपशीलासह अद्ययावत ठेवणे आवश्यक आहे. आधारवरील लिंग, नाव, पत्ता, छायाचित्र आदींमध्ये बदल झाल्यास ते अद्ययावत करण्याची आवश्यकता असते.
भारतीय विशिष्ट ओळख प्राधिकरणाने (युनिक आयडेंटिफिकेशन ऍथॉरिटी ऑफ इंडिया – यूएआयडीएआय) ” अपडेट डॉक्युमेंट’ नावाची नवी सुविधा तयार केली असून माय आधार संकेतस्थळावर ती उपलब्ध करून देण्यात आली आहे. कोणत्याही आधार नोंदणी केंद्रावरही माहिती अद्ययावत करता येते. मात्र, हे ऐच्छिक स्वरुपाचे आहे. देशातील 40 जिल्ह्यांमध्ये हा प्रकल्प प्रायोगिक तत्वावर राबविण्यात येत असून त्यापैकी पुणे जिल्ह्याची निवड करण्यात आली आहे.
आवश्यक कागदपत्रे – आधारसाठी ओळखीच्या पुराव्यासाठी विविध कागदपत्रे स्वीकारली जातात.
त्यामध्ये मनरेगा जॉब कार्ड, निवृत्ती वेतन कार्ड, पारपत्र, जन्म तारखेसाठी – जन्म प्रमाणपत्र, पॅन कार्ड, गुणपत्रिका, ओळखीचा पुरावा – शिधापत्रिका, मतदार ओळखपत्र, वाहन परवाना यांचा समावेश आहे. आधार केंद्र व
अधिकच्या माहितीसाठी
www.uidai.gov.in या संकेतस्थळावर संपर्क साधावा, असे आवाहन प्रशासनाकडून करण्यात आले आहे.
