बंगळुरु : कर्नाटक विधानसभा निवडणुकीची रणधुमाळी सुरु झाली आहे. जनता दल (सेक्युलर) पक्षाचे नेते कुमारस्वामी यांनी एका प्रचार सभेत मोठी घोषणा केली आहे. जेडीएसकडून शेतकऱ्यांशी विवाह करणाऱ्या मुलांनी २ लाख रुपये देण्यात येतील, असं त्यांनी म्हटलं आहे. सरकारनं शेतकऱ्यांच्या मुलांच्या लग्नासाठी ज्या मुली शेतकरी मुलांसोबत लग्न करतील त्यांना २ लाख रुपये द्यावेत, अशी मागणी देखील त्यांनी केली.
कुमारस्वामी यांनी कोलारमधील एका सभेत हे वक्तव्य केलं होतं. सभेत बोलताना ते म्हणाले की शेतकऱ्यांच्या मुलांसोबत लग्न करायला मुली तयार नाहीत, असं निवेदन मिळालं आहे. शेतकऱ्यांच्या मुलांशी लग्न करणाऱ्या मुलींना २ लाख रुपये दिले जावेत. सरकारनं हा निर्णय घेतल्यास शेतकरी कुटुंबातील तरुणांसाठी आणि त्यांच्या कुटुंबीयांसाठी हा मोठा निर्णय असेल, असं ते म्हणाले.
कर्नाटकची विधानसभा निवडणूक सध्या तिरंगी होणार आहे. काँग्रेस आणि भाजपसोबत जेडीएसनं देखील रणशिंग फुंकलं आहे. काँग्रेसनं निवडणुकीसाठी उमेदवारी जाहीर करण्यात आघाडी घेतली होती. आतापर्यंत काँग्रेसनं दोन टप्प्यात उमेदवारांची घोषणा केली आहे. जेडीएसनं पहिल्या टप्प्यात ९३ उमेदवारांची घोषणा केली. तर, भाजपनं काल १८९ उमेदवारांच्या नावांची घोषणा केली आहे.
मतदानपूर्व चाचण्यांमध्ये काँग्रेस आघाडीवर राहील, असा अंदाज वर्तवण्यात आला आहे. आता सध्या उमेदवारांच्या नावांची घोषणा करणं सुरु आहे. उमेदवारी अर्ज दाखल केल्यानंतर प्रचाराची रणधुमाळी सुरु होणार आहे.
