नाशिक: धरणामध्ये लघुशंका करण्यापेक्षा थुंकणे चांगले, असा खोचक टोला हाणत विरोधी पक्षनेते अजित पवार यांना लक्ष्य करणारे ठाकरे गटाचे खासदार संजय राऊत यांनी आता या वादातून सपशेल माघार घेतली आहे. अजित पवार यांच्याविषयी अर्धवट माहितीच्याआधारे मला प्रश्न विचारण्यात आला. मी आणि अजितदादा कोणत्याही गोष्टीवर लगेच प्रतिक्रिया देतो. मी अजित पवार यांच्याविषयी कडक शब्दात बोललो, त्याचा खेद व्यक्त करतो, असे संजय राऊत यांनी म्हटले आहे. ते रविवारी नाशिकमध्ये प्रसारमाध्यमांशी बोलत होते.
अजित पवार यांनी संजय राऊत यांच्या कृतीविषयी भाष्य केल्यानंतरया वादाला तोंड फुटले होते. अजित पवार यांनी संजय राऊत यांच्या बोचऱ्या टीकेनंतरही सामंजस्याची भूमिका घेतली होती. महाराष्ट्राची संस्कृती, परंपरा आहे. प्रत्येकाने तारतम्य ठेवून वागावे. ते मोठे व महान नेते आहेत. त्यांच्या बोलण्याने अंगाला छिद्र पडत नाही, असे सांगत अजित पवार यांनी या वादावर पडदा टाकला होता. त्यानंतर आता संजय राऊत यांनीही अजित पवार यांच्याविषयी कठोर शब्दांत केलेल्या टीकेविषयी खेद व्यक्त करत आपल्या बाजूनेही हा वाद संपल्याचे संकेत दिले आहेत.
