जेजुरी : श्री क्षेत्र जेजुरी येथील खंडोबा गडावरील मुख्य मंदिराचा आणि अश्वाचा गाभारा सोमवारपासून दुरुस्तीच्या कामासाठी दीड महिना बंद राहणार आहे.
या काळात गडावर आलेल्या भाविकांना कासवापासून देवाचे दर्शन घ्यावे लागणार असून दोन्ही गाभाऱ्यात जाता येणार नाही. २६ ऑगस्ट ते ५ ऑक्टोबरपर्यंत दुरुस्तीचे काम चालणार असल्याची माहिती खंडोबा देवस्थानचे मुख्य विश्वस्त पोपटराव खोमणे यांनी दिली.
खंडोबा गडावर विकास आराखड्याची कामे सुरू असून गडाचे जतन करण्यासाठी आवश्यक त्या दुरुस्त्या आणि उपाययोजना केल्या जात आहेत. यासाठी सुमारे १०७ कोटी रुपयांचा आराखडा मंजूर झाला आहे.
खंडोबा देवस्थानच्या कार्यालयात मंदिरातील विकासकामांच्या नियोजनासंदर्भात पुजारी, सेवक, ग्रामस्थ, खांदेकरी, मानकरी, सामाजिक कार्यकर्ते यांच्या बैठकीच्या आयोजन केले होते. याप्रसंगी मुख्य विश्वस्त पोपटराव खोमणे, अॅड. पांडुरंग थोरवे, डॉ. राजेंद्र खेडेकर, अनिल सौंदाडे, मंगेश घोणे, अॅड. विश्वास पानसे, अभिजित देवकाते, व्यवस्थापक राजेंद्र जगताप, प्रमोद चव्हाण आदी उपस्थित होते.
गाभाऱ्याचे काम सुरू असताना गडावर येणाऱ्या ज्या भाविकांना अभिषेक, महापूजा करावयाची त्यांनी पंचलिंग भुलेश्वर मंदिरात करता यावी. मुख्य गाभाऱ्याचे काम पूर्ण झाल्यावरच पंचलिंग मंदिराची दुरुस्ती करण्यात यावी, अशी मागणी करण्यात आली. विकासकामांना सहकार्य करण्याचे आवाहन विश्वस्त मंडळाने केले आहे. मुख्य गाभारा, अश्वाचा गाभारा, पंचलिंग मंदिर, भुलेश्वर मंदिर, भंडार घर आणि तुळजाभवानी मंदिराचे काम होणार असल्याची माहिती बैठकीत देण्यात आली.
