पुणे : अमली पदार्थ तस्कर ललित पाटील याच्यासह १४ साथीदारांविरुद्ध महाराष्ट्र संघटित गुन्हेगारी नियंत्रण कायद्यान्वये (मोका) कारवाई केली आहे. याबाबतचा आदेश ( पोलिस आयुक्त रितेश कुमार यांनी दिला.
अमली पदार्थ विक्री प्रकरणात ललित अनिल पाटील (वय ३७, रा. अक्षरधारा सोसायटी, मातोश्रीनगर, नाशिक), अरविंदकुमार प्रकाशचंद्र लोहरे (वय ३९, रा. ओशिवरा, मुंबई, मूळ रा. उत्तर प्रदेश), अमित जानकी साह ऊर्फ सुभाष जानकी मंडल (वय २९, रा. देहू रस्ता, जि. पुणे), रौफ रहीम शेख (वय १९, रा. ताडीवाला रस्ता, पुणे स्टेशनजवळ), भूषण अनिल पाटील (वय ३४, रा. मातोश्रीनगर, नाशिक), अभिषेक विलास बलकवडे (वय ३१, रा. विजय अॅनेक्स, नाशिक), रेहान ऊर्फ गोलू आलम सुलतान अहमद अन्सारी (वय २६, रा. धारावी, मूळ रा. अयोध्या), प्रज्ञा अरुण कांबळे ऊर्फ प्रज्ञा अरुण माहिरे (वय ३९ रा. विंग स्पेसेस सोसायटी, नाशिक), झिशान इक्बाल शेख (वय ३३, रा. फ्रेंड्स कॉलनी, नाशिक), शिवाजी अंबादास शिंदे वय ४०, रा. एकतानगर, नाशिक), राहुल पंडित ऊर्फ रोहितकुमार चौधरी वय ३०, रा. विरार, मूळ रा. बिहार) यांना अटक केली आहे. या गुन्ह्यात समाधान बाबाजी कांबळे (रा. नांदूर, नाशिक), इम्रान शेख ऊर्फ आमीर खान (रा. धारावी, मुंबई), हरिश्चंद्र उरवादत्त पंत (वय २९, रा. बोईसर, मुंबई) अद्याप फरार आहेत. या सर्व आरोपींविरुद्ध मोका कायद्यान्वये कारवाई केली आहे.
पोलिसांनी ससून रुग्णालयाच्या परिसरातून दोन कोटी १४ लाखांचे मेफेड्रॉन जप्त केले होते. या प्रकरणी बंडगार्डन पोलिसांनी गुन्हा दाखल केला होता. त्यानंतर दोन ऑक्टोबरला ललित ससूनमधून पसार झाला होता. त्याला मुंबई पोलिसांनी चेन्नई परिसरातून अटक केली होती.
ललितकडून आणखी तीन कोटींचे सोने जप्त
ललित याने नाशिकमधील एका सराफा व्यापाऱ्याकडे ठेवलेले सुमारे तीन कोटी रुपये किमतीचे पाच किलो सोने पोलिसांनी जप्त केले. पुणे पोलिसांच्या गुन्हे शाखेच्या पथकाने नाशिकमध्ये ही कारवाई केली. ललित सध्या पुणे पोलिसांच्या कोठडीत आहे. त्याची कसून चौकशी करण्यात येत आहे. ललितने नाशिकमधील एका सराफा व्यापाऱ्याकडे सोने ठेवल्याची माहिती पोलिसांना मिळाली. त्यानुसार गुन्हे शाखेचे सहायक पोलिस आयुक्त सुनील तांबे यांच्यासह एक पथक गुरुवारी (ता. २) नाशिकला रवाना झाले होते. गुन् शाखेच्या पथकाने त्या सराफाकडून पाच किलो सोने जप्त केले आहे. यापूर्वी पोलिसांनी ललितचा भाऊ भूषण पाटीलच्या घरातून एक कोटी ८० लाख रुपये किमतीचे तीन किलो सोने जप्त केले होते.
