मुंबई : लोकसभा निवडणुकीत मित्रपक्षांना मागणीपेक्षा भाजप फार कमी जागा देणार असे म्हटले जात असताना लहान मित्रपक्षांना भोपळा मिळणार असे चित्र आहे. राष्ट्रीय समाज पक्षाने भाजपकडे काही जागांची मागणी केली होती, पण ती अमान्य करण्यात आल्याने आता जानकर हे शरद पवार यांच्या राष्ट्रवादीच्या संपर्कात आहेत.
जानकर यांनी २०१४ मध्ये बारामतीतून राष्ट्रवादीच्या सुप्रिया सुळे यांच्याविरोधात निवडणूक लढवली होती. ते रासपचे उमेदवार होते आणि भाजपने त्यांना पाठिंबा दिला होता. मात्र, त्यांचा पराभव झाला होता. जानकर यांनी आता भाजपला कंटाळून महाविकास आघाडीशी चर्चा सुरू केली आहे. आम्ही मविआला परभणी, सांगली व माढाची जागा मागितली आहे, असे जानकर यांनी सोमवारी पत्रकारांना सांगितले.
सध्याचे राहू द्या… विधानसभेत बघू…
– केंद्रीय राज्यमंत्री रामदास आठवले यांच्या नेतृत्वातील रिपब्लिकन पक्षाला भाजप जागा देणार नाही, हे स्पष्ट झाले आहे. विधानसभा निवडणुकीत तुम्हाला जागा देऊ या आश्वासनावर त्यांची बोळवण करण्यात आल्याचे समजते.
