कोल्हापूर : यंदा लोकसभा निवडणूकीत महाविकास आघाडीने श्रीमंत शाहू महाराज छत्रपती यांना उमेदवारी देण्यात येत असल्याची घोषणा आज उद्धव ठाकरे यांनी केली आहे. उद्धव ठाकरे यांनी कोल्हापूर दौऱ्यावर येत नवीन राजवाडा येथे शाहू महाराजांची भेट घेतली. लोकसभेसाठी शाहू महाराजांमागे शिवसैनिक पूर्ण ताकदीनं उभा राहील, असं ते यावेळी म्हणाले.
यावेळी लोकसभा निवडणुकीच्या अनुषंगाने दोघांमध्ये खलबत देखील झाली. यावेळी स्वतः श्रीमंत शाहू महाराज छत्रपती, युवराज मालोजीराजे छत्रपती, मधुरिमाराजे छत्रपती उपस्थित होते. मात्र या भेटीदरम्यान माजी खासदार संभाजीराजे यांची अनुपस्थित असल्याच समोर आले आणि चर्चांना उधाण आले.
शाहू महाराजांसोबत बंद खोलीत चर्चा : राज्याचे माजी मुख्यमंत्री उद्धव ठाकरे यांची आज (21 मार्च) मिरज येथे जाहीर सभा होत आहे. तत्पूर्वी दुपारी साडेतीन वाजता कोल्हापूर विमानतळावर त्यांचं आगमन झालं. यानंतर त्यांनी महाविकास आघाडीकडून निश्चित झालेले उमेदवार श्रीमंत छत्रपती शाहू महाराज यांची कोल्हापुरातील जुना राजवाडा येथे जाऊन भेट घेतली. राजवाडा येथे शाहू महाराज आणि उद्धव ठाकरे यांची गळाभेट झाली. सुमारे अर्धा तास उद्धव ठाकरे, खासदार संजय राऊत, तेजस ठाकरे यांनी शाहू महाराजांशी बंद खोलीत अर्धा तास चर्चा केली. यावेळी राजघराण्यातील सदस्य माजी आमदार मालोजीराजे छत्रपती, मधुरिमाराजे छत्रपती उपस्थित होते.
आमचं जगजाहीर असतं : उद्धव ठाकरे यांनी श्रीमंत शाहू महाराजांची भेट घेण्यामागे माझा स्वार्थ असल्याचं सांगितलं. यापुढच्या संघर्षात जो आम्ही लढतो आहे त्यात विजय मिळावा यासाठी आशीर्वाद घेण्यासाठीही आलेलो आहे. आमचं जगजाहीर असतं. यात लपवून ठेवण्यासारखं काहीच नाही. कोल्हापूर लोकसभेच्या जागेसाठी शिवसैनिक शाहू महाराजांचे निष्ठेने काम करतील, असं सांगून सांगली लोकसभेच्या जागेवर बोलणं मात्र ठाकरेनी टाळलं. सायंकाळी होणाऱ्या मिरज येथील सभेत ठाकरे कोणावर निशाणा साधतात याकडे राज्याचे लक्ष लागून राहिले आहे.
शिवसैनिकांची घोषणाबाजी : श्रीमंत शाहू महाराजांची भेट घेतल्यानंतर पक्षप्रमुख उद्धव ठाकरे राजवाड्याबाहेर आल्यानंतर उपस्थित शिवसैनिकांनी उद्धव ठाकरे यांच्या विजयाच्या घोषणांनी राजवाडा परिसर दणाणून सोडला. शिवसेनाप्रमुख दिवंगत बाळासाहेब ठाकरे असताना 1998 साली नवीन राजवाडा येथे आलो होतो, अशी आठवणही ठाकरे यांनी माध्यमांशी बोलताना सांगितली. शाहू महाराजांच्या भेटीनंतर जाहीर सभेसाठी उद्धव ठाकरे मिरजेकडे रवाना झाले.
