पुणे : लोकसभा निवडणुकीत अपयश आल्यानंतर राज्याचे उपमुख्यमंत्री अजित पवार हे राष्ट्रवादी काँग्रेसच्या आगामी विधानसभा निवडणुकीसाठी प्रचाराच्या तयारीचे रणशिंग बारामतीतूनच फुंकणार आहेत. रविवारी (१४ जुलै) ‘राष्ट्रवादी जनसन्मान महामेळावा’ बारामतीला होत असून, त्या निमित्ताने राष्ट्रवादीचे राज्यभरातील प्रमुख नेते बारामतीमध्ये ठाण मांडणार आहेत. या मेळाव्यात बारामतीवर कब्जा राखण्यासाठी नियोजनाबरोबरच प्रचाराची रंगीत तालीम करताना अजित पवार हे कोणावर तोफ डागणार, याबाबत उत्सुकता असणार आहे.
लोकसभा निवडणुकीमध्ये राष्ट्रवादी काँग्रेस शरदचंद्र पवार पक्षाच्या खासदार सुप्रिया सुळे यांचा बारामतीमधून झालेला विजय हा अजित पवार यांच्या जिव्हारी लागला आहे. सुळे यांच्या विजयानंतर ज्येष्ठ नेते शरद पवार हे राज्याच्या राजकारणाबरोबरच पुणे जिल्ह्यातील राजकीय घडामोडींवर लक्ष ठेवून आहेत. गेल्या महिन्यात त्यांनी बारामतीसह जिल्ह्याचा दौरा केला. बारामतीमध्ये त्यांनी सलग तीन दिवस बैठका आणि सभा घेऊन मतदारांशी संवाद साधला. या काळात अजित पवार हे बारामतीपासून दूर होते. दर रविवारी बारामतीत होणारा त्यांचा दरबारही भरला नाही. आता मतदारांशी पुन्हा संपर्क साधण्यासाठी ‘जनसन्मान महामेळावा’ बारामतीत घेण्यात येणार आहे.
या मेळाव्याच्या निमित्ताने होणाऱ्या जाहीर सभेत अजित पवार हे आगामी विधानसभा निवडणुकीच्या निमित्ताने कोणाला लक्ष्य करणार, याबाबत उत्सुकता असणार आहे. या महामेळाव्याला राष्ट्रवादी काँग्रेसचे राष्ट्रीय कार्याध्यक्ष खासदार प्रफुल्ल पटेल, प्रदेशाध्यक्ष खासदार सुनील तटकरे, छगन भुजबळ, दिलीप वळसे पाटील, हसन मुश्रीफ, धनंजय मुंडे हे प्रमुख नेतेही उपस्थित राहणार आहेत. त्याद्वारे विधानसभा निवडणुकीच्या पूर्वतयारीचे रणशिंग फुंकले जाण्याची शक्यता वर्तविण्यात येत आहे.
अजित पवारांचे बारामतीवर लक्ष….
या महामेळावा आणि जाहीर सभेच्या निमित्ताने राष्ट्रवादी काँग्रेसचे राज्यातील प्रमुख नेते उपस्थित राहणार असले, तरी बारामती तालुका आणि शहरातील मतदारांना आमंत्रण देण्यात आले आहे. त्यावरून अजित पवार यांनी बारामतीकडे विशेष लक्ष केंद्रित केल्याचे स्पष्ट झाले आहे. आगामी विधानसभा निवडणुकीत अजित पवार यांच्या विरोधात राष्ट्रवादी काँग्रेस शरदचंद्र पवार पक्षाकडून युगेंद्र पवार यांना उमेदवारी दिली जाण्याची शक्यता वर्तविण्यात येत आहे. युगेंद्र पवार यांनीही मतदारांशी संपर्क वाढविण्यास सुरुवात केली आहे. बारामती विधानसभा मतदारसंघात अजित पवार यांच्या विरोधात युगेंद्र पवार यांना उभे केल्यास लोकसभा निवडणुकीनंतर पुन्हा पवार कुटुंबीयांमध्ये चुरशीची लढत होऊ शकते. त्यामुळे अजित पवार यांनीही बारामतीकडे विशेष लक्ष दिले आहे.
