मुंबई : राज्यात दोन हजार पेट्रोलपंपांची संख्या वाढविण्याचे नियोजन आहे. तसेच विविध कारणांनी रखडलेल्या राज्यातील १६६० पेट्रोलपंपांच्या परवानग्या पुढील तीन महिन्यांत देण्यासाठी प्रत्येक जिल्हाधिकारी कार्यालयात ‘एक खिडकी’ सुरू करण्याचा महत्त्वाचा निर्णय महसूलमंत्री चंद्रशेखर बावनकुळे यांनी घेतला.
महसूलमंत्री बावनकुळे यांच्या अध्यक्षतेखाली इंधन कंपन्यांच्या अडचणी, समस्यांचा आढावा घेण्यात आला. महसूल विभागाचे अपर मुख्य सचिव राजेश कुमार, सह सचिव अजित देशमुख, बीपीसीएलचे सुंदर राघवन, राज्य प्रमुख राकेश सिन्हा, एचपीसीएल चे. बी. अच्युत कुमार, मुकूंद जवंजाळ आदी उपस्थित होते.
राज्यात दोन हजार पेट्रोलपंपांची संख्या वाढविण्याचे नियोजन असून पंप उभारणीमध्ये इंधन कंपन्यांना महसूल विभागाकडील अकृषिक परवानग्या, पोलीस, सार्वजनिक बांधकाम विभागातील विविध ना हरकत परवानगीच्या अडचणी दूर करण्यासाठी जिल्हाधिकारी कार्यालयात एक खिडकी सुरू करण्यात येणार आहे. पेट्रोल पंप सुरू करण्याची प्रक्रिया पुढील तीन महिन्यांत पूर्ण व्हावी यादृष्टीने परवानगी देताना अत्यावश्यक आणि कमीत कमी अटी, शर्थी ठेवता येतील का, याबाबत आदर्श कार्यप्रणाली महसूल विभागाच्या अतिरिक्त मुख्य सचिवांनी तयार करावी. विभागीय आयुक्तांनी याबाबत तातडीने सूचना पाठवाव्यात, अशा सूचना बावनकुळे यांनी केल्या.
