पुणे : Pune Rain | अरबी समुद्रात निर्माण झालेल्या कमी दाबाच्या क्षेत्रामुळे गोव्यासह कोकण, पश्चिम महाराष्ट्रात मुसळधार पाऊस कोसळत आहे. हवामान विभागाने पुणे, मुंबई, सोलापूरसह पश्चिम महाराष्ट्रात मान्सूनच आगमन झाल्याचे जाहीर केले आहे.
मुंबईला मुसळधार पावसाने झोडपून काढले असून अनेक ठिकाणी पाणी साचल्याने वाहतूक ठप्प झाली आहे. दुसरीकडे अॅक्वा लाईनवरील भुयारी रेल्वे मार्गात पाणी शिरले आहे. वरळी येथील मेट्रो स्थानकात मोठ्या प्रमाणावर पाणी साचले आहे. त्यामुळे भुयारी रेल्वे बंद करण्याची वेळ आली आहे.
मॉन्सूनने मध्य अरबी समुद्राचा आणखी काही भाग, महाराष्ट्र, कर्नाटकातील काही भागात आज प्रवेश केला. मुंबई, बंगलुरु तसेच तामिळनाडुचा उर्वरित भागात मॉन्सूनने प्रवेश केला आहे. बंगालच्या उपसागराबरोबरच मॉन्सूनने मिझोराम, त्रिपुरा, अरुणाचल प्रदेश तसेच आसाम आणि मेघालयाचा काही भागात प्रवेश केला आहे.
महाराष्ट्रातील तळकोकण, गोवा येथे ५ जुनला सर्वसाधारणपणे मॉन्सूनचे आगमन होते. तेथे यंदा २५ मेलाच आगमन झाले. त्यानंतर एका दिवसातच मॉन्सूनने आणखी पुढचा पल्ला गाठत मुंबईसह पश्चिम महाराष्ट्र व्यापला आहे. कोकण, पश्चिम महाराष्ट्रातील काही भागात १० जून तर मुंबईमध्ये मॉन्सून येतो, यंदा मात्र २६ मेलाच मॉन्सूनने निम्म्या राज्यात आगमन केले आहे.
लोणावळ्यात २३६ मिमी पावसाची नोंद़
मॉन्सूनच्या आगमनाबरोबर राज्यात अनेक ठिकाणी मुसळधार पाऊस सुरु आहे़ लोणावळ्यात गेल्या २४ तासात तब्बल २३५ मिमी पावसाची नोंद झाली आहे़ त्यामुळे येथून उगम पावणाऱ्या उल्हास नदीला पूर आला आहे.
