पुणे (प्रतिनिधी) राज्याच्या राजकारणात सध्या जोरदार राजकीय घरवापसीचा ट्रेंड सुरु आहे. काँग्रेसचे एकामागून एक नेते भारतीय जनता पक्षाच्या वाटेवर आहेत. त्यातच आता पुरंदरचे माजी आमदार संजय काका जगताप यांनी आपली भूमिका स्पष्ट करत १६ जुलै रोजी भाजपमध्ये प्रवेश करणार असल्याची घोषणा केली आहे.
“माझी आणि भाजपची बिनहुंड्याची सोयरीक ठरली आहे,” अशी भावनिक आणि सडेतोड पोस्ट संजय काका जगताप यांनी त्यांच्या फेसबुक अकाउंटवर केली. त्यांच्या या घोषणेमुळे पुणे जिल्ह्यातील काँग्रेस पक्षाला आणखी एक जबरदस्त धक्का बसला आहे.
संग्राम थोपटेनंतर जगताप यांची घरवापसी
संजय काका जगताप यांच्या आधी काही दिवसांपूर्वीच भोर-राजगड-मुळशी मतदारसंघाचे माजी आमदार संग्राम थोपटे यांनी भाजपमध्ये प्रवेश करून काँग्रेसचा हात सोडला होता. आता संजय काकांच्या निर्णयामुळे पुणे जिल्ह्यात काँग्रेसचा बालेकिल्ला म्हणून ओळखल्या जाणाऱ्या भागात भाजप अधिक मजबूत होत असल्याचे चित्र स्पष्ट होत आहे.
भाजपचा पक्षवाढीचा मास्टरप्लान?
राज्यातील अनेक माजी आमदार, बंडखोर पदाधिकारी, व निष्ठावान कार्यकर्त्यांना पक्षात सामावून घेऊन भाजप आगामी विधानसभा निवडणुकीसाठी संगठित ताकद उभारण्याच्या प्रयत्नात आहे. संजय काका जगताप यांचा प्रवेश हे त्याचेच आणखी एक पाऊल मानले जात आहे.
१६ जुलै रोजी प्रवेश सोहळा :
१६ जुलै रोजी मुंबईत आयोजित कार्यक्रमात संजय काका जगताप अधिकृतरित्या भाजपमध्ये प्रवेश करणार आहेत. या कार्यक्रमास उपमुख्यमंत्री देवेंद्र फडणवीस, प्रदेशाध्यक्ष चंद्रशेखर बावनकुळे यांच्यासह इतर वरिष्ठ नेत्यांची उपस्थिती अपेक्षित आहे.
काँग्रेसमध्ये चिंता वाढली
या सततच्या पक्षत्यागामुळे काँग्रेसमध्ये नाराजीचे व अस्वस्थतेचे वातावरण निर्माण झाले आहे. नेतृत्वाच्या असमर्थतेवर प्रश्न उपस्थित केले जात असून, वरिष्ठ नेत्यांकडून मजबूत संघटन आणि जमिनीवर पुन्हा पकड मिळवण्याची गरज अधोरेखित केली जात आहे.
राज्याच्या राजकीय नकाशावर काँग्रेसच्या विस्कटत चाललेल्या चित्रात आता संजय काका जगताप यांचा भाजप प्रवेश हा आणखी एक ठळक अध्याय ठरणार आहे. आगामी निवडणुकांच्या पार्श्वभूमीवर याचा मोठा राजकीय परिणाम होण्याची शक्यता आहे.
