पुणे : मशिदींवरील भोंगे हटवले नाहीत, तर तिथेच समोर लाऊडस्पीकर लावून हनुमान चालिसा वाजवण्याची भूमिका मनसे अध्यक्ष राज ठाकरे यांनी गुढी पाडव्याच्या मेळाव्यात घेतली होती. मात्र, आपण असं करणार नसल्याचं म्हणत मनसेचे माजी पुणे शहराध्यक्ष वसंत मोरे यांनी त्याविरोधी भूमिका घेतली. या मुद्द्यावरून पक्षानं त्यांच्यावर कारवाई करत त्यांची शहराध्यक्षपदावरून उचलबांगडी केली. या पार्श्वभूमीवर वसंत मोरे यांनी अजूनही आपण मनसेमध्येच असल्याचं स्पष्ट केलं असलं, तरी कारवाईविषयी बोलताना त्यांच्या डोळ्यात अश्रू उभे राहिले.
मला हीच भीती वाटत होती….
वाद घालण्याची आपली कधीही भूमिका नव्हती, असं वसंत मोरे म्हणाले आहेत. “मला नेहमी जी भीती वाटत होती ती हीच होती. हीच भूमिका मी पक्षासमोर मांडण्याचा प्रयत्न केला. २००७पासून १७पर्यंत इथले मुस्लीम बांधव एका हिंदूसाठी कायम पुढे आले आहेत. पण यांच्या दारात जाऊन भोंगे वाजवायचे, काहीतरी भूमिका घ्यायची, एकमेकांशी वाद घालायचे ही माझी कधी भूमिका नव्हती कधी”, असं मोरे म्हणाले आहेत.
माझ्यावर पक्ष कारवाई करेल, असं कधी वाटलं नव्हतं
दरम्यान, अशा कारणासाठी पक्षाकडून कारवाई होईल, असं कधी वाटलं नसल्याची खंत यावेळी वसंत मोरे यांनी बोलून दाखवली. यावेळी बोलताना वसंत मोरे यांच्या डोळ्यांत अश्रू उभे राहिले. “माझ्यावर पक्ष कारवाई करेल, अशा विषयासाठी हे मला कधी वाटलं नव्हतं. या पक्षात वयाची २७ वर्ष घातली. हकालपट्टी हा विषय मला खूप लागलाय. वसंत मोरेची हकालपट्टी होऊ शकत नाही. माझ्या कार्यकर्त्यांना तोच शब्द लागलाय अशी भावनिक प्रतिक्रिया वसंत मोरे यांनी दिली.
