पुणे, दि. 16 मार्च – राज्यातील जिल्हा परिषद शाळांमधील शिक्षकांच्या आंतरजिल्हा आणि जिल्हांतर्गत बदल्यांसाठी नव्याने सहा अधिकाऱ्यांचा समावेश असलेल्या अभ्यासगटाची स्थापना करण्यात आली आहे. या अभ्यासगटाने शिक्षक बदल्यांबाबत सन 2022 मध्ये राबवलेली प्रक्रिया, त्यातील अडचणी, शिक्षक संघटनांशी प्रातिनिधिक चर्चेतून मिळणाऱ्या माहितीचा अभ्यास करून बदल्यांच्या धोरणाबाबत शिफारशी, सन 2023 च्या आंतरजिल्हा आणि जिल्हांतर्गत बदल्यांबाबत संभाव्य वेळापत्रकाबाबत एका महिन्यात अहवाल देण्याचे निर्देश अभ्यासगटाला ग्रामविकास विभागाकडून देण्यात आले आहेत.
पुणे जिल्हा परिषदेचे मुख्य कार्यकारी अधिकारी आयुष प्रसाद यांच्या अध्यक्षतेखाली सन 2020 मध्ये अभ्यास गट स्थापन करण्यात आला. या अभ्यासगटाने सन 2021 मध्ये सुधारित धोरण निश्चित केले. त्यानुसार शिक्षक बदल्यांसाठी स्वतंत्र संगणक प्रणालीद्वारे आंतरजिल्हा बदल्यांची प्रक्रिया राबवली. सध्या जिल्हांतर्गत बदल्यांची प्रक्रिया सुरू आहे. मात्र या बदल्यांबाबत शिक्षक संघटनांकडून निवेदने देण्यात आली व न्यायालयात याचिकाही दाखल करण्यात आल्या. या याचिकांवर शासनाने न्यायालयात मांडलेल्या भूमिकेला अनुसरून बदल्यांबाबत सन 2021 मधील तरतूदी आणि सूचना, निवेदने या बाबत अभ्यास गटाकडून शिफारसी घेणे आवश्यक आहे.
नव्या अभ्यास गटामध्ये पुणे जिल्हा परिषद मुख्य कार्यकारी अधिकारी हे अध्यक्ष आहेत. नाशिक जिल्हा परिषदचे मुख्य कार्यकारी अधिकारी, बीड जिल्हा परिषदेचे मुख्य कार्यकारी अधिकारी, कोकण विभागीय आयुक्त कार्यालयाचे उपायुक्त, ग्रामविकास विभागातील जिल्हा परिषद आस्थापनेचे उपसचिव, अतिरिक्त सचिव आदींचा समावेश करण्यात आलेला आहे.
