बारामती : दिवसा मतदान करा, यात्रा-जत्रा रात्री, काय कापाकापी करायची, तमाशा बघायचा तो रात्री बघा, त्या गौतमी पाटील बाईला बोलवा, अशा मिश्किल शब्दांमध्ये विरोधी पक्ष नेते अजित पवार यांनी कार्यकर्ता व पदाधिकाऱ्यांना बाजार समितीच्या निवडणुकीमध्ये मतदान करण्याचे आवाहन केले. अजितदादांच्या या वक्तव्यानंतर कार्यकर्ता मेळाव्यात मात्र चांगलीच खसखस पिकली.
कृषी उत्पन्न बाजार समिती निवडणुकीच्या पार्श्वभूमीवर रणधुमाळी सुरू आहे. राष्ट्रवादी पुरस्कृत रयत पॅनलच्या माध्यमातून जाहीर कार्यकर्ता मेळाव्याचे आयोजन करण्यात आले होते. यावेळी विरोधी पक्षनेते अजित पवार बोलत होते.
पुढे बोलताना पवार म्हणाले की, माझ्या विषयी अनेक बातम्या पसरवण्याचे काम केलं. पत्रकार जरा कुठ गेलं तर अजित पवार नॉट रिचेबल. बाकी लोक आहेत की… माझ्यामागे का आहेत बाबा? एखाद्याच्या मागे लागायचं म्हणजे किती मागे लागायचे? मी असं का बोललो, असं विचारले जाते. मी मला येतं ते बोलतो. लोकांना असं वाटतं की २०१९ ला जसं केलं, तसंच जातो की काय. पण मी आज तुम्हाला सांगतो की मी कायमच राष्ट्रवादीमध्ये राहणार आहे, असा पुनरुच्चार अजित पवारांनी केला. अजित पवार आणि बारामती असं एक नातं तयार झाले आहे. येणाऱ्या बातम्यांकडे लक्ष देऊ नका असे आव्हान पवारांनी यावेळी कार्यकर्त्यांना केले.
