पुणे : वाढदिवसानिमित्त पत्नीला मनपसंत भेटवस्तू दिली नाही म्हणून ठोसा मारून पतीचा खून झाल्याची चर्चा संपूर्ण महाराष्ट्रात गाजली होती. मात्र पुण्यातील वानवडी येथे पत्नीच्या मारहाणीत मृत्यू झालेल्या पतीचा जीव नाकावर ठोसा मारल्याने नव्हे; तर धारदार शस्त्राने मारहाण केल्याने गेल्याची शक्यता पोलिसांनी वर्तविली आहे.
दुबईला वाढदिवस साजरा केला नाही; तसेच लग्नाच्या वाढदिवसाला मनपसंत भेटवस्तू दिली नाही या कारणावरून झालेल्या भांडणातून पत्नीने पतीच्या तोंडावर ठोसा मारला. या हल्ल्यात पतीचा मृत्यू झाल्याची घटना शुक्रवारी वानवडीत घडली होती. निखिल पुष्कराज खन्ना (वय ३६) असे मृत्युमुखी पडलेल्याचे नाव आहे. डॉ. पुष्कराज खन्ना यांनी तक्रार दिली आहे. त्यावरून पत्नी रेणुका खन्ना (वय ३८) तिच्यावर गुन्हा दाखल करून वानवडी पोलिसांनी तिला अटक केली. न्यायालयात हजर केले असता, २८ नोव्हेंबरपर्यंत पोलिस कोठडी सुनावण्यात आली.
सप्टेंबरमध्ये रेणुकाचा वाढदिवस होता. तिला दुबईत वाढदिवस साजरा करण्याची इच्छा होती. मात्र, निखिल तिला दुबईला घेऊन गेला नाही. पाच नोव्हेंबरला लग्नाचा वाढदिवस झाला. त्या वेळीही त्याने रेणुकाला मनपसंत भेटवस्तू दिली नव्हती. त्याचा तिला राग होता. रेणुकाच्या भावाच्या मुलीच्या वाढदिवसासाठी डिसेंबरमध्ये दिल्लीला जायचे होते. यावरून दोघांमध्ये वाद सुरू होते. वादात रेणुकाने ठोसा मारल्याने निखिलचा मृत्यू झाल्याचे तक्रारीत नोंद आहे. मात्र, तत्पूर्वी निखिलने रेणुकाच्या छातीवर बसून मारहाण केली. त्यानंतर रेणुकाने निखिलला चार ते पाच ठोसे मारल्याचे तिच्या वकिलांनी न्यायालयात सांगितले.
रेणुकाने निखिलला धारदार शस्त्राने मारल्याची शक्यता आहे. तपास करायचा असल्याने सरकारी वकिलांनी पोलिस कोठडीची मागणी केली. सरकारी वकील वर्षाराणी जाधव यांनी बाजू मांडली
